الرئيسيةالتسجيلدخول

شاطر | 
 

 حوار مع شاعرنا الفحل حسين عبد الحميد

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
Admin
المدير العام
المدير العام


عدد المساهمات : 76
تاريخ التسجيل : 14/05/2013
العمر : 59

مُساهمةموضوع: حوار مع شاعرنا الفحل حسين عبد الحميد   الأربعاء يونيو 05, 2013 12:22 pm




كلنا
سمعنا بقصة (طه البطحانى وريا) وكلنا اعجب بها واليوم تلك التى بين ايدينا
قصة ابطالها حقيقيون اما كاتبها فهو حسين عبد الحميد اما الاسماء فسوف
نقوم بتغييرها الى (مجدد والتومة) احتراما لخصوصيات الاخرين
اولا: دعونا نتعرف على صاحبها عن قرب انه حسين عبد الحميد حسين من قبيلة القدوراب وهو كاتب دوبيت ومسادير
س: من اى المناطق انت؟
ج:السروراب الريف الشمالى
س: كيف اثرت منطقتكم فى كتابتك للدوبيت؟
ج: نحن فى السروراب من عشاق الدوبيت والمسادير والدلوكة
س: اذكر لنا بعض اعمالك؟
ج: هذه القصة اضافة الى كتابات اخري واشعار عند عدد من الملحنين
قصة مجدد والتومة
مجدد: من يومى ال رايتك نميت كتير بغناكى
بدور شوفة عيونك والتانية القى رضاكى
كملتى الجمال ما لقيت شبيه بسواكى
بدور باقى العمر يا السمحة اعيشو معاكى
التومة: داك يوم السعادة يوم يجيبك لينا
اديناك الامان ابدا وتعال قول لينا
لو عارفين دروبك كنا ليكا مشينا
اسرح تعال يا مجدد قول النميم واشجينا
قال لها: كل ما جيت بالدقير لى شوفتك دوام بتمنى
وانا شاحد الكريم تدخل قلوبنا محنة
لو حضرك سرور كان بي قصايدك غنى
اسرعى يا الحبيبة ريدك خلاص جننا
قالت له: الفارس الصميم ان شاء الله يرتاح بالك
خلاص بيك اكتفيت ما دايرة تانى بدالك
بس جيب لى رقبتك ما دايرة اصلا مالك
انا فى ملل راجياك المولى يصلح حالك
قال لها: كا ما اتذكرك عينى تابى النوم
شغلتى الفكر يا ست القبيلة عموم
كل ما جيت بالدقير اسال عليك كل يوم
شوفتك لى سعادة وبتزيلى منى هموم
قالت : كل ما دق بابنا بنقول مجدد جانا
مشتاقين ليك كتير وشوفتك دوام شاغلانا
دايما ذكرتك فى خشومنا باقيا لبانة
اسرع تعال يا مجدد التومة فيك عشمانة
قال مجدد: ادخلت الفرح فى قلبي أ المريودة
بس شوفة عيونك يا ملكه هى المقصودة
بتطفى لي نار جوه الفؤاد موقودة
اخوك يا ام سماح فى الحارة نحنا اسودا
قالت: كل البلد فرحانه وخبرا سعيد عماها
بندور السعادة نحيا ونعيش فى ضراها
جيب نفسك تعال افراحنا جات نبداها
وما يهمك كتير انا روحى ليك بفداها
قال مجدد: شاورتى الصغار ان شاء الله يرتاح بالك
انا لى سنين عشمان كايس بدورو وصالك
باكر يا ام خدود قررت جاييك سالك
ارقصي لى الاسد وادينى من شبالك
قالت: حباب الاسد مرحب حبابك مية
شاورت الصغار ما لقيت معارض ليا
تعال شوف الزريبة هيلك ملانة سعيه
عوسك كملو والباقى خلو على
قال لها: انا حلمى كلو بدورك تكونى جوارى
اسعد بيها شوفتك واحكى ليك اسرارى
نمسح كل هم واكمل معاك مشوارى
وفرحوا لينا الشباب وتغنى لينا قمارى
قال لها: ختيتك فى القلب ما لى تانى بلاكى
بخيرى تب جاييكى قول ليا احكى مناك
باكر من دغش الساعة ستة معاكى
نجمع كل الاهل ويعقد علينا الزاكى
(الزاكى هو المأذون بتلك المنطقة)
بالعديل والزين كل الخلايق نمت
حسيت بالسعادة ويا دابة روحى انجمت
فرسان القريات الليلة جاتنا ولمت
وبدوا فى العرس والفرحة دودت وعمت
تم لى مناى والليلة يومى سعيد
لاقيت الملاك والدنيا صبحت عيد
قنديل الشمال الخاتى من تقليد
انعم يا كريم باولاد اساندوا الايد
قالت: حباب الاسد الليلة تم مناهو
والزول الدبير سيفو السنين بسعاهو
القرياتى اب درق الليلة ضوا سماهو
والجرح القبيل يا دابو لاقى دواهو
قال لها: جيبو البخور والحنة سوا العديل والزين
ده اليوم السعيد راجيهو ليا سنين
فرسان القريات الليلة جوك لامين
جود يا كريم غطيها من العين
قالت: حباب اهلى القريات واسد القبيلة حبابو
اب قلبا ظلط كل العرب بتهابو
باليوم السعيد الليلة كتب كتابو
بالمال والعيال يا ربي تفتح بابو
قال: سلام أ التومة زولة الحديث والشورى
سلام ام رشوم ال بالعطر مغمورة
بى فرسان العرب فرحتنا تم حضورا
جات مقنع الكاشفات ومجبر المكسورة
قالت: حباب الاصيل الليلة يوم الزفة
حباب ود القبائل دابى الكراكن النفة
غنن يا بنات للراقى دقوا الكفة
دخرى الحوبات ما ادانا ضهروا ولفا
قال لها: شكرتى كتير وشكرك على كفاية
وبي شوفة عيونك الليلة تم منايا
جمالك يا ام سماح ما بدورلو اصلو قراية
ومانى البخيب ظنك حملك بشيلو برايا
قالت له: طبروا يا عيال فارس القريات لمّ
موصوف بالكرم بحر المسور ال عم
ما خاف من فقر بذل النفس ما همّ
من ما تب قام بي شينة تب ما اتسمّ
قال لها:خلاص تم الفرح واتجمعوا الطنبارة
والسمحه ام خدود نزلت تعوم فى الدارة
سوت رقيص الفن ونفذت ادواره
جذبت عقول الناس كباره وصغاره
قالت: خلاص يا الهميم ورينى قول اسرارك
من زمنا طويل جوا القلب مقدارك
لى الضيفان دوام دايما مولعه نارك
فى الضيق والعدم دايما بتستر حالك
المحرر
طبعا اعزائى القراء ولان هذه الاشياء تخضع للقسمة والنصيب فان ابطال هذه
القصة الحقيقيين حدث بينهم الفراق وانصرف كلاً منهم الى حال سبيله وهم
اليوم من سكان السروراب وقبل ان ننصرف نحن ايضا الى حال سبيلنا الشكر الى
سكان السروراب والى الشاعر الاستاذ: حسين
عبد الحميد شاعرالدوبيت والمسادير
والذى نقول له ماذا تود ان تقول فى كلمة اخيرة:
حسين عبد الحميد :
اهلا بت الربيع الليلة شرفتينا
بحضورك يمين والله نورتينا
الجو انعدل وبيكي اصبح زينة
وسائلين الكريم يا ربى احفظا لينا




الرجوع الى أعلى الصفحة اذهب الى الأسفل
http://alsururab.sudanforums.net
ود البورت
مراقب المنتدى
مراقب المنتدى
avatar

عدد المساهمات : 271
تاريخ التسجيل : 14/05/2013

مُساهمةموضوع: رد: حوار مع شاعرنا الفحل حسين عبد الحميد   الأربعاء يونيو 05, 2013 12:52 pm

مشكور علي اللقاء الاكثر من رائع يا جعفر
الرجوع الى أعلى الصفحة اذهب الى الأسفل
عبد الجليل
مشرف
مشرف
avatar

عدد المساهمات : 21
تاريخ التسجيل : 19/05/2013
العمر : 54

مُساهمةموضوع: رد: حوار مع شاعرنا الفحل حسين عبد الحميد   السبت يونيو 08, 2013 12:43 pm

مبدع يا حسين
مشكور يا ادمن
الرجوع الى أعلى الصفحة اذهب الى الأسفل
abdalla altyeb abushama
مشرف
مشرف


عدد المساهمات : 94
تاريخ التسجيل : 15/05/2013
العمر : 31
الموقع : KSA

مُساهمةموضوع: رد: حوار مع شاعرنا الفحل حسين عبد الحميد   الأحد يونيو 09, 2013 12:15 am

جميييييييييييييييييل وغاية في الروعة هكذا هم شعراء بلادي
ربي أحفظهم وأجعلهم دائماً فخراً لنا وللسروراب
الرجوع الى أعلى الصفحة اذهب الى الأسفل
محى الدين حسن



عدد المساهمات : 1
تاريخ التسجيل : 17/05/2014
العمر : 50
الموقع : بحرى - الحاج يوسف

مُساهمةموضوع: رد: حوار مع شاعرنا الفحل حسين عبد الحميد   الأحد مايو 18, 2014 8:46 am

لكم التقدير والاعجاب
الرجوع الى أعلى الصفحة اذهب الى الأسفل
 
حوار مع شاعرنا الفحل حسين عبد الحميد
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
 :: منتديات السروراب :: منتدى الشعر والأدب-
انتقل الى: