مخير الله,لاشالت مطرة الخير ولامن الوجع صبت
ولا كتل الضلام حسك ولاريح الكلام هبت
محل ماتنورق الحمى ومحل حيل الصبر ما انبت
محل تبدا القصيدة البوح تكون بت القصيدة ابت
شهور والجته فاقده الروح تساسق بين ظنون الموت
وموجوع البحر ساكت بحنس لالسان لاصوت
خبارو وكت رقد فرحك ممدد في الغنا ومختوت
ولاغنيتي للجاتك
ولاعزيتي في الفاتك
خبارك يعني عاد لامتين تحنسي في السكات ينضم
عشان يترجا كم استاذ بعد كتبنو الفاتك
خبارك لونك اتدفق علي وجع النحيب تابوت
خبارك لالسان لاصوت
مواويل تايهه
لا ارتاحت خطاك لاجفت الاحزان ولا ربت علي كتفك جناك لاجاك
خبارك صاحيه آخر الليل ومالو الليل دا ماحجاك
ومالو اكان براح الكون مرق من فجتو وفجاك
خبارك ضايقه في وشك وساعات الفضا الفايقه
وخبارك ضقتي ما قبال اكان الدنيا جت بتجيك وكت تشكي وتكون ضايقه
خبارك ساكته لابتنوحي لابتبوحي
لابتوحي لابتزحي
مالك ويعرفولك كيف وصمتك ساوا ليكي حجاب وبيهو الناس تقول رايقه
وقميص الروح وخيل الهم دا هسي لحدي وين سايقه؟
خلاص اتمدد الاذان
خلاص شبع القلب احزان
امرقي عشان ولاد الغنوه ماتو جاعو وشبعو وجعه وذل
امرقي عشان تجي القمره وعشان يشى النهارات ضل
امرقي عسى القصيده تجي وعسى الجوع الهرد كبدة سنيني العجفا يلقى تكل
امرقي ومدي ايد الحن وقول لي ها الجفا المالك مفاتيح قولنا هاكا اكل
ولا كلت ولاملت
ولا مرقت ولاقالت
ولا بين البيوت فلت
ولا بن ناسا اتعالت
ولارغم النويح طلت
ولاختت ولاشالت
ولافرحة هواك طلت
ولادمعة شقاك سالت
ولا زالت
حزن منشري ضد النيل
تسابق في نهار الناس عشان تستر فجايع الليل
وجع هد الجبال ورجع رجاك فتران وفاقد الحيل
مكلفه تدي انتي مروه خابر كم وجايعك سيل
ها ما تندسي في حزنك
ولا ترجي المطر ينزل قبل تدي البحر اذنك
ولا قدرك غناك المر ولابتحمل الالم التقيل وزنك
ولابتدي الكضب اذنك
هيا حورية المطره
هديك الدنيا واقفالك .امانه ولوعتا وخطره
بطون الامه بي بطره
عليك الله القلوب الناس علي الدين القويم فطره
امرقي وبشري الامات
زغاريد الوجع مرقن وكت شافع سعادتك مات
حريم شدر الحراز رجن الخريف بي ضحكه منلمات
وراجنك
قبل ماتفوتي كانو الناس بموتو محبه في حنك
هديل نسوة مدينة الروح مع امراة العزيز جنك
بعزنك علي انك مرقتي من السعاده ضحى ومرق وجع الوطن منك
ولدتي بعد فجيعه وخوف
ظروفك ماها اي ظروف
وقف حال الزمن جريتي بيك جيب الفراغ مسروف
نهز قدرك قفاك ورضيتي يعني عشان اساك معروف
قنعتي من الالسمع والجته من نبض الحنين والجوف؟
ها مالك ومال بنات الدمعه والالم البمرض الجوف
ومالك ومال خلايق راقده في جلباب عشم مكفوف
ومالك ومال حنينك انتي؟
ماقبال شحدنا القمره تطلعي منها ومابنتي
مالو كنا نحن ضحكنا لحظة وجعه ماكان بنتي
لو عمر الفرح اوجاعنا ماكان في قلوبنا سكنتي
ياحورية المطره الهلاكك عند اجاويدك
خبارك راكزه للرمضا وهدا الضل كلو فوق ايدك
خبارك لاوجع هزاك ولا حز الزمن جيدك
ولاكحل العمى عيونك ولا انكسرن مراويدك
ولا شفعولك الرادوك وكل الدنيا بتريدك
هيا حورية المطره!!!!!!!
