دا حال الدنبا يوم بالفرحة تتلقانا
ويوم بي وش عبوس ترمينا في أحذاننا
ما بدوم السعد في الدنيا ما بغشانا
منها غير نحيب يا ربي تتولانا
رحلت زينة الأمات أخت أخوانها
ركازة الديار من ساسها لي بيبانها
رباية اليتيم وللجاع قدورها ملانه
ختاية العيوب دي اللعروض صوانة
رحلت آمنة وااا حذنآ عليك يا آمنه
ووا فجعتنا في السروراب ووا آلامنا
يا حليل الأصيله الطيبة نور عتامنا
كيف بعدك نعيش وكيفن تكون أيامنا
نعاك ضي الشمس وكتين خفت يا آمنه
قبال الخبر يوصل سكت نضامنا
حالآ شفنا طير الشوم حوانا وحامنا
يسوى النووح وجاب خبر الفوات إعلامنا
سال دمع المقل بلل عطن هدامنا
فاض بحر الشجون يا قيفه جاك هدامنا
ليه يادنيا شلتي رويحة من أجسامنا
خليتينا لا حيين ولا ميتين قصدتي إيلامنا؟
كانت بيك ديارنا تملي عاامره وآمنة
وكنتي الكل وست الكل عموم آآ آمنة
في جواك نحس طيبة ومحاسنآ كامنة
وفي وشك تهل البسمة نور قدامنا
غبتي وغاب معاك وعد الخريف وغمامنا
يا حليلو وحليلك يا فصول أيامنا
قدر الله النزل شق السما وأجسامنا
أركزي يا أرض الليله جاتك طامه
لكن دي الحياه ومصيرنا بكرة مماتنا
محسوب العمير كان عشناه فانية حياتنا
يا رب ياكريم تمحى وتزيل سيئاتنا
ولي الحيين جميع ولكل عزيزآ فاتنا
ولزمنا الصبر يا رب تخلي مصابنا
رغم قساوتو هين وقعو يا علامنا
وأرحم آمنة وأغفر ليها ويبقى مرامنا
في جنانك تعيش هانية وسعيدة وآمنه.
لها الرحمة والمغفرة وأسكنها الله مع الصديقين والشهداء وحسن أولئك رفيقآ.
